Hvat merkja ávaringarljósini í bilinum?

Um ljósið fyri parkeringsbremsuna tendrar, merkir tað, at handbremsan er sett. Hetta er serliga týdningarmikið at leggja til merkis, áðrenn tú byrjar at koyra, tí tað kann elva til álvarsligan skaða á bremsuskipanini, um tú roynir at koyra við henni tikinari. Tendrar hetta ljósið, skalt tú altíð tryggja tær, at handbremsan er fullkomiliga leyst, áðrenn tú setur bilin í rørslu.

Um airbag-ljósið tendrar, kann tað merkja, at ein feilur er í airbaginum ella í trygdarbeltaskipanini. Í summum førum kann ljósið eisini tendra, um ein barnastólur er settur í framsæti. Um tað ikki kemst av einum barnastóli, skalt tú seta teg í samband við eitt verkstað fyri at fáa kanna møguligar villur í airbag-skipanini.

Um tú koyrir í einum plug-in hybrid ella einum elbili, hevur tú kanska sæð hetta ljósið fyrr – tað vísir eitt bilbattarí. Tað reyða ljósið er tekin um, at ein feilur er við streymveitingini – t.d. at battaríið trekkir streym, men uttan at verða løtt. Ljósið plagar at tendra í displayinum, tá motorurin ikki koyrir. Men tað er ikki vanligt, at ljósið heldur áfram at lýsa, eftir at motorurin er startaður. Um tað hendir, eigur tú at fáa kanna battaríið og dynamoina á verkstaði. Um bilurin ikki verður kannaður, kann tað enda við, at hann brádliga ikki vil starta.

Tú hevur helst sæð hetta ljósið fyrr. Tað reyða ljósið, sum vísir opnar hurðar. merkir, at ein ella fleiri hurðar ikki eru latnar rætt aftur. Um ljósið sæst í displayinum, skalt tú steðga bilinum beinanvegin og kanna, hvørjar hurðar ikki eru latnar aftur, áðrenn tú heldur fram at koyra.

Tað reyða ávaringarljósið við einum útropsmerki í miðjuni kann merkja ymiskar villur í bremsuskipanini. Tað kann m.a. vísa, at tú ikki hevur loyst handbremsuna, áðrenn tú byrjaði at koyra. Hevur tú eina elektroniska handbremsu, verður ljósið vanliga merkt við einum ‘P’ í staðin fyri útropsmerkið. Um ljósið ikki stavar frá handbremsuni, kann tað merkja, at bremsuveska manglar ella at bremsuklossarnir eru slitnir. Í slíkum føri eigur bilurin at verða kannaður á verkstaði skjótast til ber.

Ljósið við einum reyðum tríkanti við útropsmerki í miðjuni er eitt tekin um eina almenna ávaring, tí ikki allar villur og ávaringar hava sítt egna ikon. Hetta ávaringarljósið kann broytast frá bili til bil, men vanliga merkir tað ein minni feil. Í nýggjari bilum fylgir ofta ein tekstur við, so tú beinleiðis kanst síggja, hvat er galið. Um eingin tekstur kemur fram, skalt tú seta teg í samband við verkstaðið, so tey kunnu gera eina feilkanning av bilinum.

Um displayið vísir eitt reytt termometer, merkir tað, at motorurin er ov heitur, at tað manglar kølaraløgur, ella at motorurin ikki kølir, sum hann eigur. Ein ov heitur motorur er álvarsamur trupulleiki, sum kann geva stórar skaðar – og tað kann gerast dýrt at umvæla. Tendrar ljósið, skalt tú sløkkja motorin beinanvegin. Tá bilurin hevur fingið stund at køla av, kanst tú kanna, um ljósið er horvið. Vit mæla tó altíð til, at tú setur teg í samband við eitt verkstað skjótast gjørligt, so bilurin kann verða kannaður.

Um displayið vísir eitt reytt oljuljós, kann tað merkja, at oljutrýstið er ov lágt, at bilurin manglar olju, ella at oljan ikki verður pumpað runt. Vanligast er, at ljósið tendrar, tí bilurin manglar olju – hetta kanst tú tó sjálvur kanna. Royn oljustøðuna á bilinum (minst til at motorurin skal hava verið sløktur í uml. 10 min., um hann hevur verið tendraður). Um bilurin manglar olju, fyllir tú upp til “Max”. Starta síðani bilin og hygg, um ljósið er burturi. Um oljuljósið framvegis lýsir, skalt tú ringja eftir einum verkstaði.

Um ljósið vísir ein reyðan persón við trygdarbelti, merkir tað, at ein persónur situr í einum setri uttan at hava trygdarbelti á. Í summum bilum verður eisini ein ljóðávaring sett í gongd, sum heldur áfram, inntil trygdarbeltið er spent fast. Sensorarnir í setrunum kunnu eisini taka við, um tú hevur eina tunga vøru liggjandi á setrinum. Í slíkum føri mæla vit til, at tú leggur tað í viðførisrúmi, so ljósið ikki tendrar óneyðugt.

Tað gula ljósið við tekstinum ‘ABS’ merkir, at bremsuskipanin ikki bremsar heilt niður, men uttan at hjólini blokkerast. Um ljósið tendrar, skalt tú seta teg í samband við eitt verkstað skjótast gjørligt, so bremsuskipanin kann verða kanna fyri møguligar villur. Vit mæla til, at tú koyrir varliga, inntil tú fært tíð á verkstaði.

Hetta gula ljósið við eini bensinpumpu hevur tú helst sæð áður. Tað merkir, at tú eigur at finna eina bensinstøð skjótast gjørligt, tí tangin er við at verða tómur. Tað er ymiskt frá bili til bil, nær ljósið tendrar, men vanliga kanst tú koyra uml. 50 km, áðrenn tangin er heilt tómur. Hevur tú gloymt, hvørja síðu tað ber til at fylla á? Í flestu bilum er ein lítíl pílur við síðuna av bensinpumpuni ið vísur, til høgru ella vinstru. Soleiðis veitst tú altíð, hvørja síðu tað er á.

Tú hevur helst sæð hetta ljósið fyrr. Ljósið vísir eitt gult ikon við bylgjulínum, og tað merkir, at aftara tokuljósið er tendrað. Tokuljós eru týdningarmikil í toku, tá ið tað regnar sera illa ella tá sýnið er sera vánaligt. Um veðurlíkindini eru góð, og eingin toka er, skulu tokuljósini vera sløkt, tí tey kunnu vera til ampa fyri aðrar bilførarar.

Hetta ljósið boðar frá, at tíð er komin til eitt serviceeftirlit av bilinum. Tá ljósið tendrar, skalt tú bóka eina tíð á verkstaði.

Hetta gula ljósið boðar frá, at bilurin manglar sprinklaravesku. Tú skalt tí fylla á skjótast gjørligt. Tað er týdningarmikið at hava sprinklaravesku á bilinum, tí ein skitin fram- ella bakrútur kann minka um sýnið og gera koyringina vandamikla.

Hetta gula ljósið er eitt tekin um, at ein broyting er í dekktrýstinum. Hetta er sera vanligt eftir eitt dekk­skifti, men kann eisini vera ein áminning um, at eitt av dekkunum hevur ov lágt trýst. Hevur tú júst skift dekk, kanst tú endurstilla dekktrýstið í bilinum. Í summum førum kann eisini ein broytandi hitastøða ávirka málaran fyri dekktrýst.

Hetta ljósið sæst, tá tú tendrar bilin, og er eitt tekin um, at motorurin er í gongd við at hita upp. Ein dieselmotorur skal nevniliga hitna, áðrenn tú kanst byrja at koyra við bilinum.

EPS verður víst sum ein bilur við bremsusporum og kann koma fram, tá skipanin er virkin ella óvirkin. Um ljósið blinkar undir koyring, merkir tað, at bilurin hevur sett anti-spin-funkuna í gongd. Skipanin forðar bilinum í at missa hald ella glíða – hetta hendir serliga í ringum veðri, t.d. um tú kemur út í aquaplaning. Um ljósið lýsir støðugt, merkir tað, at anti-spin (EPS) er óvirki. Hetta kann koma av, at tú óvart hevur trýst á ein knøtt, ella at ein feilur er í skipanini. Um talan er um ein feil, mæla vit til at seta teg í samband við eitt verkstað.

Hetta ljósið sæst bara í dieselbilum, hetta merkir, at partikulfilturið ikki virkar optimalt og tørvar reins. Ein dieselbilur hevur ikki gott av at koyra nógvar stuttar túrar. Hann hevur brúk fyri at verða ordiliga heitur, so partikulfilturið kann “blásast gjøgnum” og reinsast. Royn at koyra ein longri túr, uml. 40 minuttir. Um ljósið ikki hvørvur eftir tað, skalt tú seta teg í samband við eitt verkstað, so partikulfilturið kann reinsast fullkomiliga.

Hetta gula ljósið vísir, at ein almennur feilur er í motorinum, og tí eigur tú at lata bilin verða kannaðan á verkstaði. Um tú bíðar ov leingi við at seta teg í samband við verkstað, kann feilurin gera størri skaða á bilin. Tú kanst tó vanliga halda fram at koyra, so leingi bilurin ber seg at, sum hann plagar.

Hetta ljósið vísir, at nærljósið/koyriljósið er tendrað. Flestu nýggjari bilarnir eru útgjørdir við automatiskum dagljósi (DRL – Daytime Running Light). Skipanin tendrar sjálv framljósini, tá tað er myrkt, og er tí sløkt um dagin. Vanliga fert tú at uppliva, at ljósið (og sjálv ljósini) tendra, tá tú koyrir gjøgnum tunnlar skrásetir broytingar í ljósinum.

Um hetta ljósið tendrar í displayinum, er tað ein áminning um, at langljósið er tendrað. Langljós skulu einans nýtast, tá tað er sera myrkt, og eingin bilur koyrir undan tær ella ímóti tær, tí tey kunnu blenda aðrar bilførarar. Nýggjari bilar hava vanliga automatisk langljós. Hetta merkir, at skipanin sjálv skrásetir, nær tað er neyðugt at nýta langljós, og sløkkir tey sjálv, tá aðrir bilførarar eru nær.

Nakrir bilar eru útgjørdir við trygdarskipanini Lane Assist. Ikonið kann hava ymiskar útgávur, men vísir, at skipanin hjálpir bilinum at halda seg á røttu koyribreytini. Um bilurin er á veg út av breytini uttan boð, kann skipanin sjálv taka yvir og stýra bilin varisliga aftur á røttu leið. Hetta sæst vanliga sum eitt lítið rist í rattinum, eitt ikon í síðuspegilinum og møguliga eisini ein ávarandi ljóð.

Um tú hevur koyrt á køldum døgum, hevur tú helst sæð hetta ljósið. Tað ávarar um, at temperaturin úti nærkast frystipunktinum, og at vandi er fyri hálku og verri veg­haldi. Ikonið kemur vanliga fram, tá temperaturin er undir 4 stigum. Tá tað sæst í displayinum, er tað eisini eitt gott høvi at minnast til at bóka tíð til vetrardekk.